«Արցախն առաջին հերթին մարդիկ են». Զոհրաբ Մնացականյանն ընդունեց ֆրանսիական պատվիրակությանը

ԱԳ նախարար Զոհրաբ Մնացականյանն այսօր՝ հոկտեմբերի 14-ին ընդունել է Ֆրանսիայի խորհրդարանականների եւ քաղաքապետերի գլխավորած պատվիրակությանը:

ԱԳ նախարար Մնացականյանը նշեց. «Ես բարձր եմ գնահատում Ձեր ավանդը եւ շարունակական ջանքերը հայ-ֆրանսիական բարեկամության խորացման եւ ամրապնդման գործում: Մեր ժողովուրդներին միավորում են բարեկամության, միասին ապրելու, վստահության եւ հարգանքի խորը զգացումները»:

Կողմերը գոհունակություն հայտնեցին փոխադարձ հետաքրքրություն ներկայացնող ոլորտներում առկա փոխգործակցության եւ ապակենտրոնացված համագործակցության առնչությամբ՝ ուղղված ժողովուրդների բարեկամության եւ մարդկանց միջեւ շփումների ամրապնդմանը: Այս համատեքստում երկուստեք կարեւորվեց նաեւ խորհրդարանական հարթակի ներուժի լիրաժեք կիրառումը եւ այդ ձեւաչափում համատեղ ջանքերի գործադրումը։

Նախարարը ֆրանսիական պատվիրակության խնդրանքով անդրադարձավ Հայաստանում Կառավարության կողմից նախաձեռնված բարեփոխումների լայն օրակարգին՝ որպես գերակա առաջնահերթություն ընդգծելով դատաիրավական համակարգի բարեփոխումը եւ վերջինիս նկատմամբ հանրային վստահության բարձրացումը:

Նախարար Մնացականյանը ներկայացրեց նաեւ Հայաստանի արտաքին քաղաքական առաջնահերթությունները: Լեռնային Ղարաբաղի հիմնախնդրի խաղաղ կարգավորման գործընթացի շուրջ վերջին զարգացումների համատեքստում Զոհրաբ Մնացականյանն ընդգծեց, որ Արցախն առաջին հերթին մարդիկ են, ովքեր օգտվում են մարդու անօտարելի իրավունքներից, իսկ մարդկային շփումները դրանց անքակտելի մասն են կազմում։

ԱՎԵԼԻՆ