«Քաղաքապետարանը որեւէ մեկին չի պարտադրում աղբաման գնել». Հակոբ Կարապետյան

«Քաղաքապետարանը որեւէ մեկին չի պարտադրում աղբաման գնել». Հակոբ Կարապետյան

19:41 12 Օգս, 2019

Քաղաքապետարանը, բնականաբար, որեւէ մեկին չի պարտադրում աղբաման գնել, եւ դրա կարիքը չկա։ Այս մասին այսօր՝ օգոստոսի 12-ին, Երեւանի քաղաքապետ Հայկ Մարությանի խոսնակ Հակոբ Կարապետյանն իր ֆեյսբուքյան էջում գրառում է արել՝ արձագանքելով Դավթաշեն վարչական շրջանի նախկին ղեկավար Ռուսլան Բաղդասարյանի որոշ հայտարարություններին:

Գրառման մեջ, մասնավորապես, ասվում է.

«Դավթաշեն վ/շ նախկին ղեկավար Ռուսլան Բաղդասարյանը ֆեյսբուքի իր էջում գրել է, թե իբր իր ունեցած տեղեկություններով. քաղաքապետարանը սրճարանատերերին պարտադրում է 4-6-ական աղբաման գնել:

Քաղաքապետարանը, բնականաբար, որեւէ մեկին չի պարտադրում աղբաման գնել, եւ դրա կարիքը չկա. համայնքը իր կարիքների համար մինչեւ տարեվերջ առնվազն 8000 աղբաման, ինչպես նաեւ աղբահանությունն ու սանմաքրումը կազմակերպելու համար անհրաժեշտ այլ գույք եւ տեխնիկա ձեռք կբերի:

Ընդ որում, ձեռք բերված աղբամանների մի մասն արդեն տեղադրված է Դավթաշեն վարչական շրջանում, այն նույն թաղամասում, որտեղ նախկինում կառավարում էին Ռուսլան Բաղդասարյանն ու իր թիմակիցները, եւ որտեղ, ըստ իրավապահների, վերջին տարներին առանձնապես խոշոր չափերի չարաշահումներ ու յուրացումներ են տեղի ունեցել:

Եթե նախաքննության այս տվյալները հաստատվեն (իսկ դրա համար առերեւույթ բոլոր հիմքերը կան), ապա շատ ավելի ակնհայտ կդառնան Բաղդասարյանի՝ պարբերաբար ապատեղեկատվություն տարածելու հակման հիմքերը»։

 

loading...