Մարդկության IQ-ն աստիճանաբար նվազում է. նորվեգացի գիտնականներ

Մարդկության IQ-ն աստիճանաբար նվազում է. նորվեգացի գիտնականներ

17:10 13 Հնս, 2018

Նորվեգացի գիտնականները պարզել են, որ վերջին մի քանի տասնամյակի ընթացքում IQ թեստերի արդյունքները վկայում են մարդկանց ինտելեկտի մակարդակի նվազման մասին: Գիտնականների վերլուծությանն անդրադարձել է MedicalXpress-ը:

Գիտնականների տվյալների համաձայն՝ 20-րդ դարի առաջին կեսի ընթացքում IQ-ի մակարդակի աճը ստացել է Ֆլինի էֆեկտ անվանումը (ինտելեկտի գործակցի աճ): Այս ֆենոմենը բացատրելու համար բազմաթիվ վարկածներ են առաջ քաշվել, և գործոնների շարքին է դասվել սննդի, առողջապահության և ուսման որակի բարելավումը:

Նշվում է, որ ժամանակի ընթացքում սա փոխարինվել է հակառակ էֆեկտով, և մարդկանց մտավոր ունակությունները սկսել են նվազել:

Աղբյուրի հաղորդմամբ՝ հետազոտության հիմք են հանդիսացել 1970-2009 թվականներին զինվորական ծառայության անցած նորվեգացիների IQ-ի թեստավորման արդյունքները:

Ընդհանուր առմամբ, գիտնականները 730 հազար թեստի արդյունք են օգտագործել:

Հետազոտողների հաշվարկների համաձայն՝ մի սերնդափոխության արդյունքում բնակչության ինտելեկտի մակարդակը միջինը նվազել է 7 կետով: Գիտնականների կարծիքով՝ IQ-ի մակարդակի նվազումը մասամբ կարող է կապված լինել շրջակա միջավայրի գործոնների, ինչպես նաև՝ մարդկանց կենսակերպի հետ:

loading...