Լապշինը ենթադրել է, որ CNN-ի հայտնի հաղորդավարի մահը կարող է կապված լինել Ղարաբաղի մասին նրա ֆիլմի հետ

Ինչպես արդեն հայտնել ենք‚ CNN-ի՝ Հայաստան այցելած և Սերժ Թանկյանի մասնակցությամբ ֆիլմ նկարահանած հաղորդավարն ինքնասպան է եղել:

Արցախ այցելելու համար Ադրբեջանում դատապարտված, ավելի ուշ ազատություն ստացած ռուս-իսրայելցի բլոգեր Ալեքսանդր Լապշինը ֆեյսբուքյան իր էջում արված գրառման մեջ ենթադրել է, որ CNN-ի հայտնի հաղորդավար Էնթոնի Բուրդենի մահը կարող է կապված լինել Ղարաբաղի մասին նրա ֆիլմի հետ:

«Ի՞նչ եք կարծում՝ հայտնի ամերիկացի հաղորդավար Էնթոնի Բուրդենի մահը կապվա՞ծ է Ղարաբաղի մասին նրա ֆիլմի հետ: Ադրբեջանի իշխանությունները նրան սուր քննադատության էին ենթարկում և սպառնում էին հաշվեհարդարով: Բառացիորեն վերջերս ես Le Monde-ում հրապարակեցի «Ադրբեջանն առևանգում է և սպառնում բոլորին, ով նրան դուր չի գալիս» վերնագրով հոդված և ահա՝ անակնկալ «ինքնասպանություն»,- գրել է նա:

Լապշինը հիշեցրել է, որ Բաքվի բանտախցում իր դեմ մահափորձը նույնպես փորձել են ինքնասպանություն ներկայացնել:

Բլոգերը հավելել է, որ հայտնի լրագրող Անտոն Նոսիկը «հանկարծակի» մահացել է Ղարաբաղ այցելելուց կարճ ժամանակ անց, և հիշեցրել է, որ Ադրբեջանի իշխանությունները նրան նույնպես սպառնում էին:

Հիշեցնենք, որ վաթսունմեկ տարեկանում կյանքից հեռացել է CNN հեռուստաալիքի հայտնի հաղորդավար և շեֆ-խոհարար Էնթոնի Բուրդենը։ CNN-ի հաղորդմամբ՝ «Էնթոնի Բուրդեն. անծանոթ վայրեր» հաղորդաշարի հեղինակի մահվան պատճառն ինքնասպանությունն է:

Բուրդենը գտնվում էր Ֆրանսիայում և աշխատում էր իր հաղորդաշարի առաջիկա հաղորդման վրա: Նրա մոտ ընկերը՝ ֆրանսիացի խոհարար Էրիկ Ռիպերտը, Բուրդենին մահացած է հայտնաբերել ուրբաթ առավոտյան՝ նրա հյուրանոցային համարում:

Ամերիկյան CNN հեռուստաալիքի «Էնթոնի Բուրդեն. անծանոթ վայրեր» հաղորդաշարի մայիսի 20-ի թողարկումը նվիրված է եղել Հայաստանին: Էնթոնի Բուրդենը հաղորդման շրջանակում այցելել է Հայաստան ու ներկայացրել երկրի խոհանոցը, մշակույթն ու պատմությունը: Նրան հաղորդման ընթացքում ուղեկցել է հանրահայտ System of a Down ռոք խմբի անդամ Սերժ Թանկյանը:

ԱՎԵԼԻՆ