ՏՄՊՊՀ որոշմամբ «Վեոլիա Ջուր» ընկերությունը տուգանվեց 20 միլիոն դրամով

ՏՄՊՊՀ որոշմամբ «Վեոլիա Ջուր» ընկերությունը տուգանվեց 20 միլիոն դրամով

14:03 7 Նյմ, 2018

Այսօր՝ նոյեմբերի 7-ին ՀՀ Տնտեսական մրցակցության պաշտպանության պետական հանձնաժողովի նիստում կայացված որոշմամբ «Վեոլիա Ջուր» ՓԲ ընկերության հանդեպ կիրառվեց տուգանք՝ 20 միլիոն դրամի չափով:

ՏՄՊՊՀ-ից հայտնեցին են, որ պատասխանատվությունը կիրառվել է գերիշխող դիրքի չարաշահման համար: «Արազեն» հայ-գերմանական ՀՁ ընկերությունը, «Վեոլիա Ջրի» պատճառով հայտնվել է ոչ մրցակցային իրավիճակում եւ դադարեցրել արտադրությունը: 

«Արազեն» հայ-գերմանական համատեղ ձեռնարկությունը դիմել է ՏՄՊՊՀ, տեղեկացնելով, որ ընկերությունը զբաղվում է ջրաչափերի արտադրությամբ, սակայն «Վեոլիա Ջրի» անօրինական գործողությունների հետեւանքով դուրս է մղվել շուկայից եւ այս պահին դադարեցրել է արտադրությունը:

Մասնավորապես, ըստ «Արազենի» դիմում-բողոքի, «Վեոլիա Ջուր» ընկերությունը զբաղեցնում է մենաշնորհ դիրք: Վերջինս զբաղվում է նաեւ ջրաչափերի ներմուծմամբ եւ տեղադրմամբ: Միայն մեկ տարվա ընթացքում ներկրել է ավելի քան 30 հազար ջրաչափ: Գնման գործընթացը տեղի չի ունեցել հրապարակային, եւ «Վեոլիա Ջուրը» հնարավորություն չի տվել այլ տնտեսվարողների եւս, մասնավորապես՝ իրենց գործելու այդ շուկայում:

Մինչդեռ, ջրաչափերի ձեռքբերումը բաց եւ հրապարակային իրականացնելու պարագայում, իրենք եւս հնարավորություն կունենային առաջարկելու եւ իրացնելու իրենց արտադրանքը, տվյալ պարագայում՝ ջրաչափերը, որոնց վաճառքի համար ՀՀ-ում այլընտրանքային շուկաներ չկան: Նախկինում առանց որեւէ խնդրի, ընկերությունը համագործակցել է «Երեւան ջուր» ՓԲ ընկերության հետ:

«Վեոլիա Ջուրը» ջրաչափերի մատակարար ընկերությունների ընտրությունը կատարել է կամայական սկզբունքներով Հարուցված վարչական վարույթի շրջանակներում Հանձնաժողովը դիմել է «Վեոլիա Ջուր» ընկերությանը, որպեսզի վերջինս ներկայացնի տեղեկատվություն, թե ինչ չափորոշիչների եւ սկզբունքների հիման վրա են ընտրվում ջրաչափի մատակարար ընկերությունները: Սակայն, որեւէ կոնկրետ չափորորշիչ որպես այդպիսին չի ներկայացվել:

Միաժամանակ, Հանձնաժողովը պահանջել է, որպեսզի «Արազեն» ընկերությունը ներկայացնի իրենց կողմից արտադրվող բնակարանային ջրաչափերի որակը հավաստող փաստաթղթերը, ինչն արվել է: ՏՄՊՊՀ դիտարկմամբ, «Վեոլիա Ջուրը», ունենալով մենաշնորհային դիրք, մեր երկրում հանդիսանում է ջրաչափերի նկատմամբ հիմնական պահանջարկ ներկայացնող տնտեսվարողը, հետեւապես պարտավոր է այդ շուկայի բոլոր տնտեսվարողների համար ապահովելու հավասար մրցակցային պայմաններ:

«Վեոլիա Ջուրը» ջրաչափերը մինչեւ 3 անգամ թանկ գնով ձեռք է բերել. անարդյունավետ ծախսը 1 տարվա կտրվածքով կազմել է 100 մլն դրամ Համաձայն ուսումնասիրության, «Վեոլիա Ջրի» կողմից ներմուծված ջրաչափերը գնային առումով որոշ դեպքերում նույնիսկ եռակի գերազանցում են տեղական շուկայի նույն արտադրանքի գներին: Այսպես. 2017 թվականին «Վեոլիա Ջրի» ներմուծած ջրաչափերի միջին գինը ըստ տեսակների կազմել է 8 400 եւ 9 500 դրամ, այն դեպքում, երբ նշված ժամանակահատվածում տեղական շուկայում նույն ջրաչափերի միջին արժեքը սկսվել է 3 200 դրամից՝ հասնելով առավելագույնը 7 000 դրամի:

Այս տարի եւս ընկերության կողմից ներմուծված DN 15 մմ տրամագծով ջրաչափերի միջին գինը կազմել է 10 հազար դրամ այն դեպքում, երբ տեղական շուկայում դրանց գինը տատանվել է 3 300-ից մինչեւ 7 600 դրամի սահմաններում: Արդյունքում, միայն 1 տարվա կտրվածքով ընկերությունը ջրաչափերի ձեռքբերման համար վճարել է 100 մլն դրամ ավելի, որը հետագայում ներկայացրել է որպես ներդրումային ծախս:

Ստացվում է, որ «Վեոլիա Ջուր» ընկերությունը դրսեւորել է ոչ ռացիոնալ վարքագիծ. ջրաչափերի ներմուծումներ է իրականացրել առավել բարձր գներով, երբ կարող էր դրանք ձեռք բերել տեղական շուկայում գործող տնտեսվարողներից, տվյալ պարագայում՝ «Արազեն» ընկերությունից:

Փաստաթղթերի համակողմանի ուսումնասիրությունից պարզվել է նաեւ, որ «Արազեն» ընկերության կողմից արտադրվող ջրաչափերը որակապես բավարարում են բոլոր պահանջներին, այս հանգամանքը «Վեոլիա Ջրի» կողմից երբեւիցե կասկածի տակ չի առնվել:

«Վեոլիա Ջրի» վարքագիծը անհավասար պայմաններ է ստեղծել տվյալ շուկայում գործող տնտեսվարողների համար ՏՄՊՊՀ որոշմամբ, ոլորտում գերիշխող ընկերության՝ «Վեոլիա Ջրի» վարքագիծը հանդիսանում է օրենքի խախտում: Ընկերությունը պարտավոր էր ջրաչափերի ձեռքբերումներ իրականացնելու ժամանակ ապահովել հավասար եւ ոչ խտրական պայմաններ բոլոր տնտեսվարողների համար՝ նրանց հնարավորություն տալով մրցակցելու, ինչը չի արվել:

Ավելին, գերիշխողի նման վարքագիծը բացասաբար է անդրադարձել ոլորտում գործող տնտեսվարողների գործունեության վրա: Միայն մեկ տարվա ընթացքում «Արազենի» իրացման ծավալները կրճատվել են 60 տոկոսով: Հարկ է ընդգծել մի էական հանգամանք եւս. «Վեոլիա Ջրի» կողմից անհամեմատ բարձր արժեքով ջրաչափերի ձեռքբերումն այն դեպքում, երբ տեղական շուկայում առկա է եղել նույն որակական հատկանիշներով, սակայն ավելի ցածր գնով ջրաչափ, ֆինանսական առումով եղել է ոչ արդյունավետ ծախս, այն բացասաբար է անդրադարձել նաեւ վերջնական սպառողների վրա:

loading...